A e dini se shtatori është muaji i dedikuar për të luftuar kancerin e fëmijërisë dhe për të mbështetur të vegjlit që e përballojnë atë çdo ditë?

Në mbarë botën, me rastin e Shtatorit të Artë, organizohen aksione të shumta për ngritjen e ndërgjegjësimit për kancerin e fëmijërisë dhe për të motivuar kompanitë dhe individët që të përfshihen dhe të mbështesin luftën kundër kancerit të fëmijërisë.

Në rajon, organizata të shumta që ndihmojnë çdo ditë fëmijët që trajtohen nga sëmundjet malinje dhe familjet e tyre organizojnë aksione të ndryshme në të cilat mund të përfshihemi edhe ne.

Mësoni se si duken disa prej tyre dhe si mund të kontribuojmë.

E premtja e lumtur për NURDOR

Në kuadër të aksioneve me rastin e Shtatorit të Artë, disa kafene dhe restorante në qytete anembanë Serbisë do të dhurojnë 50 për qind të të ardhurave nga lëngjet e shtrydhura të shitura si donacion për NURDOR çdo të premte në shtator.

Aksioni u nis me iniciativën e vullnetarit Dushan Zllatanoviq. Siç thonë nga NURDOR - kafenetë dhe restorantet do të jenë lidhja mes NURDOR-it- dhe qytetarëve që në aksion të përbashkët të gjithë kontribuojmë në mbështetjen e superheronjve të vegjël që po kurohen nga kanceri.

Shikoni listën e kafeneve dhe restoranteve ku mund të pini lëng të shëndetshëm çdo të premte dhe të mbështesni luftëtarët e vegjël në webfaqen e NURDOR.

Nëse dëshironi të përfshiheni në këtë aksion si restorant, mund të kontaktoni organizatën në nurdorserbia@gmail.com ose në numrin 011/2681-555.

Çanta anatomike dhe mjete shkollore për fëmijët dhe të rinjtë e kuruar nga kanceri

Nën kujdesin e qytetit të Tuzlës dhe Shërbimit të Departamentit për Kulturë, Sport, Rininë dhe Mbrojtjen Sociale, në kuadër të projektit Rak nije mRAK, Shoqata PIPOL edhe këtë vit mbështet edukimin e fëmijëve dhe të rinjve të shëruar nga kanceri nga zona e qytetit të Tuzlës.

Në fillim të vitit të ri shkollor, më shumë se dyzet fëmijë dhe të rinj të shëruar nga kanceri morën çanta shkollore anatomike dhe një pjesë të mjeteve shkollore, blerja e të cilave u mbështet nga kompani me përgjegjësi shoqërore dhe donatorë të shumtë individualë.

Me shpërndarjen e çantave dhe mjeteve shkollore për fëmijët dhe të rinjtë e shëruar nga kanceri, Shoqata "PIPOL" fillon zyrtarisht fushatën e sivjetme "Shtatori i Artë", theksoi Amra Saraçeviq, kryetare e shoqatës.

Krahas shpërndarjes së çantave dhe mjeteve shkollore anatomike, shoqata PIPOL, në fillim të muajit shtator, në kuadër të fushatës Shtatori i Artë, organizon kamp rehabilitimi për fëmijët e shëruar nga kanceri, të shoqëruar nga familjarë, si dhe shumë përmbajtje dhe aktivitete edukative në komunitet.

Aktivitetet e shoqatës Zemra për fëmijët me kancer

Shoqata Zemra për fëmijët me kancer ka gjithashtu një sërë aktivitetesh me rastin e Shtatorit të Artë – muajit të ndërgjegjësimit për kancerin e fëmijërisë. Një nga aktivitetet kryesore është gara/shëtitja e Rrethit të Artë, të cilin shoqata e organizon në bashkëpunim me “Qendrën për Kulturë, Sport dhe Informacion Visoko” me patronazhin e përgjithshëm të qytetit të Visokos dhe me iniciativën e Afan Habiboviq nga Visoko, i cili po lufton një tumor në tru.

Gara do të zhvillohet më 11 shtator 2022, në orën 11:00 në Visoko. Ju mund ta mbështesni aksionin duke marrë pjesë ose duke blerë bluza Rrethi i artë, të dizajnuara posaçërisht.

Një nga aktivitetet u realizua në bashkëpunim me BH Telecom, mik i vjetër i shoqatës. Aksioni i quajtur Së bashku në garën për jetën u mbështet nga Sergej Barbarez, futbollisti i njohur i cili është fytyra e re e BH Telecom dhe që së bashku me këtë kompani do të sponsorizojnë apartamentin Visibaba në Shtëpinë e Prindërve. BH Telecom do të jetë gjithashtu sponsori kryesor i vrapimit/shëtitjes humanitare të Rrethit të Artë në Visoko.

Për të vegjlit nga Shtëpia e Prindërve u organizua edhe një takim me Sergej Barbarez. Si mbështetje shtesë, bluzat e tij të firmosura nga xhirimet e videove të Moja TV do të jenë pjesë e ankandit, të ardhurat e të cilave synojnë të mbështesin Zemrën për Fëmijët.

Për më shumë detaje mbi të gjitha aktivitetet e shoqatës, ndiqni webfaqen dhe faqen në Facebook të shoqatës.

Aktivitetet e shtatorit të shoqatës Krijesnica

Shoqata Krijesnica njoftoi se shtatorin e artë do ta shënojë me aktivitete të shumta. Një prej tyre është një botim i historive të prindërve të fëmijëve që trajtohen nga kanceri për të mbështetur, inkurajuar dhe fuqizuar të gjithë që janë në një situatë të ngjashme.

Për të qenë në rrjedha me të gjitha aksionet e tjera, ndiqni faqen e shoqatës në Facebook dhe Instagram dhe në link shikoni se si mund t'i mbështesni ato.

Një luftëtar i njohur për të drejtat e personave me sindromën Down ka dhuruar flokët e tij

Historia e mbështetjes individuale vjen nga Maqedonia e Veriut, ku një luftëtar i njohur për të drejtat e personave me sindromën Down, Aleksandar Matovski Cako, dhuroi flokët e tij për të mbështetur fëmijët me kancer.

Shoqata Victory nga Manastiri falënderoi për këtë donacion dhe ftoi të gjithë ata që mund të tregojnë mbështetje duke dhuruar flokë që do të përdoren për të bërë paruke për fëmijët që kanë humbur flokët gjatë procesit të trajtimit. Siç thonë ata, gjatësia minimale e flokëve që kërkohet për dhurim është 20 cm, dhe në mesin e donatorëve deri më tani shumica janë djem dhe vajza që duan të solidarizohen me moshatarët e tyre dhe t'i ndihmojnë në këtë mënyrë.

Besojmë se këtë shtator do të gjeni një mënyrë për të shprehur solidaritet dhe mbështetje për të vegjlit që luftojnë sëmundjet malinje.

Përveç aksioneve të përmendura, ju kujtojmë shoqatat Gjithmonë me fëmijët, Zvonçica, Fenix, Čika boca, dhe Iskra, të cilët në komunitetet e tyre janë të përkushtuar për luftën e përditshme kundër kancerit të fëmijëve dhe për të ndihmuar fëmijët që po e luftojnë atë dhe familjet e tyre. Mbështetini ata këtë shtator dhe çdo periudhë tjetër të vitit, sepse ne duhet të bëjmë vepra të mira jo vetëm në raste dhe stinë të caktuara, por sa herë që kemi mundësi ta bëjmë këtë.

A dini ndonjë ngjarje apo organizatë që ne nuk e kemi përmendur dhe që mendoni se duhet ta bëjmë? Ju lutemi na njoftoni, për të shkruar rreth tyre.