A keni dëshirë të zbuloni se si të zgjidhni model të përshtatshëm për mbledhjen e fondeve për organizatën tuaj jofitimprurëse?

Ne kemi shkruar për modelin e donacionit, kutitë e donacioneve dhe ‘crowdfunding’ në blogun e mëparshëm. Në rast se nuk e keni parë, mund ta lexoni në këtë vegëz.

Në këtë artikull mund të lexoni për katër modele (të avancuara), të tilla si mbledhja e fondeve nga kolegët, modeli i anëtarësimit, ngjarjet për mbledhjen e fondeve dhe partneriteti me sektorin e biznesit.

  • Mbledhja e fondeve nga kolegët

Mbledhja e fondeve nga kolegët përfshin angazhimin e mbështetësve për të mbledhur fonde në emër të një organizate të shoqërisë civile (OShC). Ky model është efektiv pasi i njëjti ua mundëson OShC-ve të shfrytëzojnë rrjetet e mbështetësve të tyre dhe të arrijnë audiencë më të gjerë.

Pra, si funksionon?

Organizata nisi fushatë me kohë të kufizuar siç është ‘crowdfunding’. Megjithatë, brenda tij, ka shumë fushata më të vogla të nisura nga mbledhësit vullnetarë të fondeve, të cilët më pas u drejtohen mikro-komuniteteve të tyre për mbështetje.

Mbledhësit vullnetarë të fondeve janë pjesë thelbësore e mbledhjes së fondeve nga kolegët, sepse mbledhja e suksesshme e fondeve dhe njohja më e gjerë e organizatës bëhet e mundshme falë angazhimit të tyre dhe besimit që gëzojnë ata në mikro-komunitetet e tyre. Mbështetësit të cilët u vënë në dijeni të organizatës përmes një fushate kolegiale shpesh bëhen mbledhësit vullnetarë të saj të fondeve, duke thelluar më tej lidhjen dhe besnikërinë e tyre.

Çfarë ka rëndësi të madhe për suksesin e mbledhjes së fondeve nga kolegët? Ajo është përgatitja dhe planifikimi, si në nivel organizate ashtu edhe me çdo mbledhës vullnetar. Organizata duhet të vendosë qëllim monetar dhe të përcaktojë periudhën gjatë së cilës do të zhvillohen fushatat. Mbledhësit e fondeve të organizatës përgatisin paketa materialesh që mbledhësit vullnetarë të fondeve do të mund t'i përdorin gjatë mikro-fushatave të tyre. Ata drejtojnë mbledhjen e fondeve dhe mbështesin mbledhësit vullnetarë të fondeve në promovimin e mikro-fushatave të tyre. Rezultatet më të mira arrihen kur një person nga ekipi i mbledhjes së fondeve është i përkushtuar për të punuar me mbledhësit vullnetarë të fondeve për t'i ofruar atyre mbështetje ose këshilla gjatë mikro-fushatave.

Një avantazh i rëndësishëm i mbledhjes së fondeve nga kolegët është se ai rrit dukshmërinë e organizatës falë mikro-fushatave dhe besimit që mbledhësit vullnetarë gëzojnë në komunitetet e tyre.

Një nga idetë për mbledhjen e fondeve nga kolegët mund të jetë donacioni me rastin e ditëlindjes. Supozoni se organizata feston përvjetorin ose ka një datë të rëndësishme. Në atë rast, mund të niset fushatë për mbledhjen e fondeve nga kolegët, në të cilën një numër i caktuar vullnetarësh për mbledhjen e fondeve do t'i tregojnë ditëlindjen organizatës dhe do t'u kërkojnë mikro-komuniteteve të tyre t'i japin donacione organizatës së përmendur në vend të një dhuratës. Kjo është bërë praktikë standarde vjetore për charity: water.

Shembull tjetër në nivel global është Fondacioni Movember. Çdo vit, gjatë muajit nëntor, Fondacioni Movember organizon fushatë për mbledhjen e fondeve nga kolegët, gjatë së cilës mbledhësit vullnetarë rrisin mjekrën dhe mustaqet për të tërhequr vëmendjen e publikut ndaj kancerit të prostatës dhe testikujve dhe për të mbledhur fonde për hulumtime mbi këto sëmundje.

Kur bëhet fjalë për fushatat e mbledhjes së fondeve nga kolegët, ka shumë ide dhe me organizim të mirë dhe përfshirje të komunitetit, mund të arrihen rezultate të shkëlqyera.

  • Modeli i anëtarësimit

Modeli i anëtarësimit është model i përdorur në nivel global për mbledhjen e fondeve. Ai nënkupton mbështetje në baza mujore për programet dhe përdoruesit tuaj. Përparësitë kryesore të modelit të anëtarësimit janë si vijon:

  • Ofron të ardhura të rregullta dhe të qëndrueshme, zakonisht në baza mujore ose përgjithësisht periodike (ndryshe nga modeli i financimit të shumtë);
  • Kërkon nivel prominent angazhimi dhe ndërveprimi me komunitetin tuaj (krahasuar me modelin e donacioneve);
  • Nënkupton vlerë të shtuar për komunitetin tuaj përveç përmbushjes së nevojave altruiste dhe e bën atë komunitet disi ekskluziv.

Mund të themi se ky model qëndron mes tranzicionit ndërmjet filantropisë dhe sipërmarrjes, sepse duhet të dini se si i mbani anëtarët tuaj dhe i angazhoni vazhdimisht ata, pra ka të bëjë me atë se çfarë vlere u jepni atyre.

Por, si duket konkretisht dhe çfarë mund t'u ofroni anëtarëve tuaj, në këtë rast mbështetësve?

Misioni -  Njerëzit, për t'ju mbështetur, duhet të kenë mendimet e njëjta për vlerat dhe misionin tuaj. Por, vetëm një përqindje e vogël e atyre që kanë mendimet e njëjta për misionin tuaj do të bashkohen — dhe kjo i bën ata jo vetëm mbështetësit më të mëdhenj, por edhe ambasadorët më të mirë.

Zhvillimi - Njerëzit kanë nevojë të rriten dhe zhvillohen - nëse lidheni me ta në aspektin e vlerave, ata do të duan të rriten me ju dhe ju mund t'u ofroni atyre mundësi të shumta - webinarë, trajnime, qasje në bazat e të dhënave dhe njohuri, etj.

Statusi - Të gjithë njerëzit e kanë ndjenjën e qenësishme të fitimit të statusit - nëse keni ndërtuar markë të fortë për organizatën tuaj, ajo mund të bëhet një lloj i simbolit të statusit. Kryesisht nëse përfshini dhurata, të tilla si shenja dalluese, bluza, gota dhe gjëra të ngjashme me markën tuaj, ose i shpërbleni duke u dhënë atyre letra falënderimi dhe ndani ato publikisht në faqen tuaj dhe në mediat sociale.

Kontributi – Përveç parave, njerëzit mund t'ju japin gjëra të tjera, veçanërisht ekspertizën dhe mendimin e tyre. Nëse mblidhni përkrahës të tillë rreth jush, jepuni atyre hapësirë që ata të mund të kontribuojnë më tej me këshillat e tyre dhe zgjidhjet e propozuara ose duke u bërë vullnetarë për të bërë ndonjë punë për ju si korrigjim teksti, ndihmë me bazën e të dhënave, etj.

Komuniteti - Vlera që u jepni mbështetësve tuaj mund të jetë anëtarësimi në komunitet - nëse ai komunitet ka nivel të lartë ndërveprimi dhe dobie. Sidomos në kohët e krizave, sikur të sotmet, njerëzit duhet të jenë pjesë e një komuniteti me të cilin ndajnë problemet dhe vlerat - një vend ku ata kuptojnë dhe gjejnë zgjidhje. Megjithatë, ai komunitet duhet të jetë shumë mirë i moderuar; përndryshe, pason kaosi dhe nuk mbijeton. Sigurohuni që të kombinoni anëtarësimin në komunitet me përmbajtje dhe zhvillim shtesë - qasje në bazat e të dhënave, histori nga prapaskenat, kontakte të drejtpërdrejta dhe ngjarje të rregullta.

Shndërrojeni në njëfarë loje – Ju mund t'i bëni gjërat më argëtuese duke i shndërruar në lojë dhe duke praktikuar krijimin e një loje nga mbledhja e fondeve. Për shembull, mbështetësit tuaj mund të kenë profile në faqen tuaj, të mbledhin pikë për vjetërsinë në anëtarësimin tuaj, shenja dalluese për pjesëmarrje në ngjarje, të ngrihen në nivele të reja anëtarësimi, etj. Kështu e rrisni përfshirjen e tyre.

Zbritjet – Si organizatë, ju mund të zhvilloni partneritete me biznese lokale dhe të tjera për t'u dhënë anëtarëve tuaj zbritje ekskluzive. Është situatë fitimprurëse për të dyja palët pasi ju e promovoni atë biznes në këtë mënyrë dhe ato ofrojnë zbritje për njerëzit që ju bëjnë donacione. Sigurisht, kjo nuk mund të bëhet me çfarëdo biznesi, kjo bëhet vetëm me ata, misioni i të cilëve përputhet me tuajin.

Ekzistojnë gjithashtu edhe platforma të specializuara për këtë model. Globalisht, platforma më e njohur e anëtarësimit është Patreon. Edhe pse shumë e përcaktojnë gabimisht atë si platformë për ‘crowdfunding’, Patreon është menduar për njerëzit dhe organizatat që kërkojnë mbështetje të vazhdueshme mujore për punën dhe misionin e tyre. Megjithatë, ju gjithashtu mund të zhvilloni mekanizmin tuaj në faqen tuaj.

Ky model përdoret për shoqatat profesionale të anëtarësimit, por kohët e fundit ka qenë jashtëzakonisht i popullarizuar në media. Megjithatë, organizata të tjera me marrëdhënie të forta dhe të qëndrueshme me komunitetin e tyre gjithashtu mund ta përdorin atë, veçanërisht nëse ato prodhojnë shumë përmbajtje ose janë organizata humanitare.

Modeli i anëtarësimit në UNICEF është ndoshta më i njohuri për të gjithë. Vullnetarët e tyre bisedojnë me qytetarët në rrugë dhe në shtande dhe i regjistrojnë në klubin e miqve të fëmijëve për një donacion mujor. UNICEF-i u dërgon anëtarëve të tij raporte veprimesh të kohëpaskohshme përmes adresës elektronike, por vlera e vërtetë këtu është identifikimi me UNICEF-in si markë ndërkombëtare.

SOS Fshatrat e Fëmijëve përdorin model të ngjashëm – organizatë ndërkombëtare me klube anëtarësimi për individë dhe biznese.

  • Ngjarje për mbledhjen e fondeve

Ngjarja për mbledhjen e fondeve mund të jetë një darkë gala, një ballo bamirësie, ankand virtual ose fizik i artikujve të ndryshëm, ose turne basketbolli, futsalli, tenisi ose loja me birila. Mos harroni për turnetë e lojërave (gaming). Ju gjithashtu mund të organizoni koktej donatorësh me ankand, mbrëmje stand-up, koncert muzike klasike ose koncert në klub lokal.

Keni mundësi të shumta dhe formati që e zgjidhni varet kryesisht nga ju, d.m.th., nga burimet tuaja, shuma që dëshironi të grumbulloni dhe komuniteti të cilin tentoni ta arrini.

Koncertet i mundësojnë individëve në komunitetin tuaj të përfshihen dhe të mbështesin punën tuaj, veçanërisht nëse është një nga artistët e tyre të preferuar. Turnetë sportive janë mënyrë e shkëlqyer për t'u prezantuar me sektorin e biznesit, sepse kompanitë mund të mbështesin njëkohësisht punën e organizatës dhe t'u ofrojnë punonjësve të tyre mundësinë për ndërtimin e ekipit dhe një ditë argëtuese jashtë zyrës.

Një darkë zyrtare, ballo ose koktej u mundëson individëve dhe përfaqësuesve të kompanive të mblidhen në një vend dhe të mbështesin punën e organizatës suaj. Përveç shitjes së biletave, ju mund të grumbulloni fonde duke u ofruar kompanive shikueshmëri shtesë në ngjarje përmes paketave të sponsorizimit. Këto mund të përfshijnë logot në materiale të printuara dhe digjitale, numër të caktuar postimesh në rrjetet sociale, vendosjen e përmbledhjeve në ngjarje dhe sigurisht, një numër të caktuar biletash ose vendesh në vetë ngjarjen.

Ngjarjet që u ofrojnë të gjithë pjesëmarrësve përmbajtje cilësore mund të mbështesin rregullisht organizatën tuaj, veçanërisht nëse një kompani zotohet me kontratë shumëvjeçare sponsorizimi.

Çfarë e bën të suksesshëm një ngjarje për mbledhjen e fondeve? Së pari, shuma e caktuar e mbledhur kushton më pak se një e treta e fondeve të mbledhura dhe organizimi i shkëlqyer.

Si të arrini qëllimin dhe të zvogëlohen kostot?

Filloni të planifikoni herët ngjarjen tuaj për mbledhjen e fondeve dhe pyesni për ngjarje të tjera në mënyrë që të mos shkaktohet mbivendosje. Hulumtoni se cilët artikuj dhe cilat shërbime mund të merrni si donacion të mallrave ose shërbimeve; formoni ekip vullnetar që mund t'ju ndihmojë në shumë segmente të organizimit të ngjarjeve; të krijojë partneritete me sipërmarrësit lokalë; mbi të gjitha, jini krijues sepse ju e njihni më së miri komunitetin tuaj dhe mundësitë e tij!

Një shembull i një ngjarjeje për mbledhjen e fondeve në Kosovë është Të Vallëzojmë për Nëna dhe Fëmijë, ngjarje tradicionale vjetore e mbledhjes së fondeve në Kosovë e organizuar nga Aksioni për Nëna dhe Fëmijë, me objektiv primar mbështetjen dhe përmirësimin e shëndetit të nënave dhe foshnjave në Kosovë.

Përgjatë historisë, Të Vallëzojmë për Nëna dhe Fëmijë ka mbledhur me sukses fonde për të adresuar nevojat kritike të kujdesit shëndetësor, për të promovuar arsimin dhe për të përmirësuar mirëqenien e përgjithshme të nënave dhe foshnjave të tyre.

Photo credits: Driton Paçarada

  • Partneritet me sektorin e biznesit

Zhvillimi i këtij modeli të avancuar të mbledhjes së fondeve kërkon një investim të konsiderueshëm të kohës dhe burimeve të organizatës suaj.

Vërtetë, hapi i parë është marrja e mbështetjes së njëhershme nga një kompani ose sipërmarrës përmes dhurimit të parave, mallrave ose shërbimeve, pjesëmarrjes në një ngjarje, punës vullnetare nga punonjësit ose ndonjë forme tjetër mbështetjeje. Është e domosdoshme që pas këtij hapi të parë, të falënderoni kompaninë dhe të tregoni qartë se për çfarë do të përdoren fondet e dhuruara. Ju mund ta raportoni këtë tek ata në rrjetet tuaja sociale dhe në uebfaqen tuaj.

Kur filloni të zbatoni idenë tuaj për të cilën keni marrë mbështetjen e kompanisë, ky paraqet moment të mrekullueshëm për t'i informuar ata për këtë dhe, në të njëjtën kohë, për të dhënë më shumë informacion për hapat dhe afatet e mëtejshme. Në varësi të kohës që ju duhet për të zbatuar me sukses idenë, mund të planifikoni raportime periodike për një, dy ose tre muaj, duke u fokusuar në ndikimin që ka pasur donacioni.

Raportimi i rregullt synon të informojë mbështetësit, të justifikojë besimin e tyre dhe të demonstrojë se mbështetja e tyre është duke u përdorur siç synohet. Kompanitë shpesh i përdorin këto raporte për komunikime të brendshme, veçanërisht nëse punonjësit e tyre kanë marrë pjesë në një ngjarje ose aksion vullnetar.

Një nga avantazhet e raportimit të rregullt është se ju mund të thelloni më tej komunikimin me kompaninë dhe të njihni më mirë punonjësit e saj. Ky informacion mund ta bëjë më të lehtë planifikimin e ngjarjeve të ardhshme, përgatitjen e paketave të donatorëve ose sponsorizimeve dhe fushatave të reja për mbledhjen e fondeve.

Në të njëjtën kohë, ju i lejoni kompanisë të njohë më mirë organizatën tuaj, punën dhe rezultatet e saj, dhe ndoshta më e rëndësishmja - të njohë ekipin tuaj. Kjo kontribuon në krijimin e besimit të ndërsjellë, gjë që është parakusht thelbësor për zhvillimin e partneritetit. Nëse organizata juaj vendos të mbajë ngjarje të rregullta për mbledhjen e fondeve, kjo mund të paraqesë mundësi fantastike për të bashkëpunuar me sektorin e biznesit.

Në atë rast, partneriteti mund të jetë edhe përmes dhurimit të hapësirës dhe shërbimeve, gjë që nuk ju pengon ta thelloni më tej atë partneritet në vitet në vijim dhe ta ktheni atë në mbështetje financiare.

Partneritetet me sektorin e biznesit janë model i avancuar për mbledhjen e fondeve dhe më së shpeshti gjenden në organizata që kanë zhvilluar tashmë aktivitetet e tyre për mbledhjen e fondeve.

  • Konkluzioni

Në mbarë botën, organizata të shumta jofitimprurëse mbështeten në mbledhjen e fondeve nga komuniteti për të bërë punën e tyre.

Modelet e mbledhjes së fondeve të bazuara në komunitet mund të jenë mënyrë efektive për organizatat jofitimprurëse dhe organizatat e komunitetit në Kosovë, për të mbledhur fonde dhe për të ndërtuar komunitete të forta dhe të qëndrueshme. Me përfshirje me komunitetin, promovim të përfshirjes qytetare dhe nxitje të bashkëpunimit, OShC-të mund të krijojnë modele të qëndrueshme për mbledhjen e fondeve që ndihmojnë në mbështetjen e misionit të tyre dhe të kenë ndikim pozitiv në komunitetet të cilave u shërbejnë.
 

Fotografia kryesore: Të Vallëzojmë për Nënat dhe Fëmijët (meritat për fotografi: Arben Llapashtica) 

 

Ky artikull është bërë i mundur nga mbështetja bujare e popullit amerikan nëpërmjet Agjencisë së Shteteve të Bashkuara për Zhvillim Ndërkombëtar (USAID). Përmbajtja është përgjegjësi e Catalyst Balkans dhe nuk pasqyron domosdoshmërish pikëpamjet e USAID-it ose të Qeverisë së Shteteve të Bashkuara.

Programi për Angazhim Qytetar në Kosovë është një iniciativë pesë vjeçare zbatuar nga Fondacioni Kosovar për Shoqëri Civile (KCSF) në partneritet me Agjencinë e Shteteve të Bashkuara për Zhvillim Ndërkombëtar (USAID).